الأرشيف
الفيلم الفضيحة
الفيلم الفضيحة
عرض فيلم عن التجنيس في ندوة التجنيس يمثل فضيحة حقيقية لنظام يتستر و يخون و يحيك المؤامرات في الخفاء و هو في العلن يرفع شعار الإصلاح كاذبا .
الفيلم الوثائقي عن التجنيس – كتابةً
المقدمة :
المكان : حي الدواسر بالدمام
الحدث : التجنيس السياسي في البحرين
الاسم : علي …
أنا من مواليد الدمام ، فعشت أنا سنين ما سمعت الا الأخبار سمعت يقولك نعطي جواز بحريني نعطي هذا جواز بحريني.
مقابلة مع ..
· فهد …
ساكن في الدمام في حي الدواسر.
· إسمي علي …
من مواليد الدمام وعمري 47 سنة
· بسم الله الرحمن الرحيم
أنا جمعة …
ساكن في الدمام .. حي الدواسر
· السلام عليكم ورحمة الله
الإسم جاسم
من مواليد الدمام
· بسم الله الرحمن الرحيم
أنا إسمي عبدالله …
· اسمي ابراهيم …
· الإسم عبد الرحمن … ، من المنطقة الشرقية ساكن وأنا موظف أرامكو أشتغل في السعودية.
كيف حصلت على الجنسية البحرينية ؟
فهد: والله هي عن طريق العمدة من الدمام هنا .. عن طريق العمدة تقدم وتروح الاجراءات في البحرين ويجيك الجواز هنا.
علي: لا والله سمعنا ان في تقديم على جواز بحريني وقالوا التقديم عن طريق العمدة .. عمدة الدواسر .. عمدة الدواسر حق الدمام .. أخذت أوراقي واثباتاتي السعودية ورحت قدمت عنده .. خلال ستة شهور طلع الجواز البحريني.
جمعة: الجواز مافي كلافة .. الجواز تروح حق علي بن عيسى .. يعطيك أوراق وتعبيها وتييب صورة من بطاقة العائلة والطاقة الشخصية .. كم ولد عندك .. كم بنت عندك .. كل حاجة .. أنا منهم واحد يعني يمكن أول جوازات أنا أستلمها .. حوالي 13 جواز بحريني وبطاقة سكنية وبطاقة شخصية وكل حاجة.
جاسم: حصلت على الحنسية من عمدة الدواسر علي بن عيسى .. طلبات ما طلبات أوراق وصور من الجواز .. حصلت على تقريبا سبعة جوازات أنا مع عيالي الستة وأنا السابع.
عبدالله : قدمت جوازي عن طريق المكتب علي بن عيسى .. والله ولا في صعبية يعني عطوني طلب الأوراق وأنا عبيتها وقدمت على المكتب وتم حوالي ستة شهور وجابوا لي الجواز .. اتصلوا علي وجابوا لي الجواز.
ابراهيم : قدمنا الطلب على العمدة وعطيناه أوراق وعطيناه صورة الجواز السعودي وبس هذا البرنامج حقه .. عطوني الجواز ما قصروا .. مافي إجراءات .. سوينا بس معروض وعطيناه الشيخ مالنا .. الشيخ ولد علي بن عيسى وأخذ اجراءات وصورة مال الجواز السعودي وبس.. هذه الاجراءات وراحت الاوراق وجاب لنا الجواز هو بنفسه.
عبد الرحمن : حصلت الجواز البحريني عن طريق العمدة عيسى بن علي وهو أمير المنطقة الشرقية .. أمير الدواسر يعني في المنطقة الشرقية .. شيخ الدواسر في نفس المنطقة ، وأني قدمت أخذت حوالي ثلاثة شهور.
أين تتم اجراءات الحصول على الجنسية البحرينية ؟
عبدالله : المكتب والله في عمارة المليحي.
جمعة : بس هذا المكتب كل حاجة عنده .. مكتب في عمارة المليحي الدور الثالث.
هل هناك طريقة أخرى للحصول على الجنسية البحرينية ؟
علي : وأنا أقول لهم الي يبي الجواز يروح من نفسه أحسن من طريق العمدة الصراحة ، لأن العمدة يجمع واذا صارت خمسة آلاف ستة آلاف معاملة راح يوديها ، وفي ناس ألحين راحوا ما لهم الا اسبوعين وحصلوا على الجوازات. يعني راحوا هناك البحرين سووهم ورجعوا.
متى حصلت على الجنسية البحرينية ؟
فهد : قبل سنتين.
علي : وحصلت على الجنسية البحرينية من مدة سنة ونصف والآن أروح وأرجع بالجواز البحريني ولا في معارضة ولا في حاجة.
جمعة : وثاني شي جوازي تميت للحين ثلاث سنوات من أخذت البحريني .. جواز لي ولعيالي وعيال عيالي من ثلاث سنوات وباقي عليه سنتين.
عبدالله : والله حوالي سنتين.
ابراهيم : جوازي يمكن حوالي من ثلاث سنين تقريبا.
عبد الرحمن : مقدم انا حق الجواز يمكن خمسة شهور وحصلت الجنسية البحرينية.
هل تحمل الجنسية البحرينية فقط ؟
جمعة : وعندي جواز سعودي وكلهم عندهم جواز سعودي وبحريني .. اسمع اسمع اسمع أنا مع الشخص دي .. هذا الشخص عبد الرحمن مقدم ورحت ودشيت عند علي بن عيسى وقعدت عندهم .. قلت له شوف هذا الجواز السعودي وهذا البحريني بس انت المسؤول اذا سحبوا الجواز السعودي من عندي .. قال لي : لا يحركون السعودي ولا يحركون حاجة عندك جنسية بحرينية عند سعودي ما يسحبون لاهاذي ولا هاذي.. كلام علي بن عيسى.
كم عدد أفراد عائلتك الذين حصلوا على الجنسية البحرينية ؟
جمعة : أنا عيالي مع بناتي ستة واربعة .. عشرة .. وأنا وزوجتي 12 زين .. وبنات بناتي وبنات عيالي هشام وخالد وجاسم كلهم عندهم جوازات بحرينية.
جاسم : حصلت على تقريبا سبعة جوازات ، أنا مع عيالي الستة وأنا السابع .. أنا وأهلي تقريبا فوق الثلاثين أربعين شخص في نفس البيت العائلة كلها من أطفال وكبار .. كلهم من الوالدة الى الازواج والبنات والخوات.
ابراهيم : أنا ما غير واحد بس أخذت ، وعيالي يمكن بس واحد منهم مشعل أخذ الجواز لعياله كلهم.
كم تقدر عدد الذين حصلوا على الجنسية البحرينية ؟
فهد : والله واجد .. أغلبية العوائل هنا في حي الدواسر استفادوا من الجواز البحريني.
علي : والله واجد أزيد من يمكن 15 الف كدا أو أزيد بعد.. واجد واجد أنا رحت مكتب العمدة والله أوراق واجد يعني حوالي ستة سبعة ثمانية آلاف معاملة.
جمعة : يعني عشرين ألف 22 ألف تقريبا عندهم جوازات بحرينية وسعودية .. لأن عندك الجواز السعودي لازم تصوره وتحطه مع الجواز البحريني بعدد العائلة ، عند عشرة تسوي عشرة .. يعطيك استمارات وتعبيها وتوقع عليها وكل حاجة.
ابراهيم : كم واحد ؟! .. والله ما عندي حسابهم أنا .. واجد عطو.
ما هي القبائل السعودية التي حصلت على الجنسية البحرينية ؟
ابراهيم : والله الظاهر ان هي أول ما صارت كانت مقتصرة على دواسر الدمام وبعدين صار فيها على ما قالوا وعطوا ناس موب دواسر بعد ، عطوا قحاطين وعطو زويريين وعطو ما قصروا يعني هم .. والله الأول ظهرت على الدواسر بس.
هل استفدت من الخدمات الاسكانية بالبحرين ؟
جمعة : بس في حاجة رحت حق السكن قالوا انت كبير ما نعطيك, ما نعطي الا عيالك قلت ما علي آن ابوهم مسئول وياهم قالوا لا ما نعطيك اللي يطوف الستين سنة ما يعطونه قلنا على أوامركم وبنشوف
اذا حصلت لي بيت زين بدل ما أروح اسكن في الفندق أو أأجر لي شقة أحصل لي بيت حكومة وأأثث على رغبة عيالي وبناتي أروح ليش ما أروح.
جاسم : أتمنى يكون لي سكن هناك في البحرين طلبت السكن آن مع اخواني ولا جت الموافقة ولا شي
عبد الرحمن : وان شاء الله سأقدم في السكن ان شاء الله
هل شاركت في التصويت على الميثاق والانتخابات؟
فهد : اي اكيد آن شاركت في الانتخابات اللي راحت ذي
جمعة : اي, اي نعم في الجسر وجوازي البحريني بعد بالسيارة اختموا لي آن مع ناس شباب دواسر.
ابراهيم : الميثاق اي رحنا وقعنا على الميثاق بس وقعنا في الجسر حنا يوم صار الميثاق رحنا وقعنا الميثاق وبس
وانتقلت الكاميرا الى جسر الملك فهد لتصور مشاهد للأخوة السعوديون اثناء تصويتهم في مركز اقتراع جسر الملك فهد :
أحد الناخبين السعودين : والله بالنسبة لعملية الانتخابات كانت ماشية على ابدع ما يكون وتسهيل الحمد لله في الاجراءات وما في اي عرقالة والله بالنسبة للجوازات البحرينية ما في اي اشكال طبعا بس بالرغم من الازدحام اللي صاير للمركز السعودي ولكن الاجراءات الحمد لله ماشية بحسب الطريقة المطلوبة.
آخر : العملية مريحة والأمر متيسرة كلها ولحمدالله تساهيل من جميع النواحي ولا ينقص أي شئ.
ولقاء مع عضو لجنة أحد المرشحين في الانتخابات النيابية :
أنا اسمي يوسف .. من البديع والآن ساكن في مدينة حمد حسب ظروف السكن ومن لجنة عادل … كنت موجود في تابع لجنة جسر الملك فهد بن عبد العزيز آل سعود .. عندنا طبعا أمر بالتسهيل من سمو وزير الداخلية بمساعدة الأشخاص المرشحين في الجسر بعدم الختم في جوازاتهم .. يعني ما يختمون في الجواز .. اييبونهم في الباص ويطلع معاهم شخص من الجوازات اثنين ومن الجمارك اثنين ويوصلوهم الى محل الانتخابات وينزلوهم وهم ماسكين الجوازات وكل شيء شخص شخص ومعاهم اللجنة بدون أحد اييهم ويقول لهم كدا كدا كدا.
عودة مرة أخرى للأخوة في حي الدواسر
من رشحت في الانتخابات ؟
فهد : هم أتصلوا علي عمدة من البحرين ورشحت ولا أدري وش السالفة.
جمعة : إحنا جو الينا ناس في الديوانية إهني وقالوا لنا كدا كدا كدا ، قال لنا علي بن عيسى ما عليكم منهم من عندي أنا أقولكم المحل الفلاني ، ويعني ضعنا ما نعرف وين نروح ووين نجي ، تدري في محلات في البحرين ما ندلها.
هل تحمل معك البطاقة السكانية أو الجواز البحريني ؟
تم عرض الجواز البحريني لعلي حيث كان تاريخ الاصدار : 22/10/2000
ثم تم عرض البطاقة السكانية لعلي :
تاريخ الإصدار : 14/11/2001
تاريخ الميلاد : 22/1/1958
المهنة : لحام
رقم واسم صاحب العمل : وحدة خارج البحرين.
ثم تم عرض الجواز البحريني لجمعة حيث كان تاريخ الاصدار : 21/10/1999
ثم تم عرض البطاقة السكانية لجمعة وكان العنوان المكتوب على البطاقة :
بيت 1631 طريق 1632
مدينة المحرق 216
وقد انتقلت الكاميرا الى مجمع 216 في مدينة المحرق ، طريق 1632 وبالتحديد لبيت 1631 وتم طرق الباب فخرج أحد العمال الهنود وقال ان هذا البيت يخص وليد … والساكنين في هذا البيت يعملون في شركة انشاءات !!
ماهي اقتراحاتك ؟
عبدالله : والله من صوبي أنا أقترح يكون مكتب هنا يعني يساعد المواطن حق أي طلب مثل طلب اسكان .. الجواز ينتهي يوديه المكتب هم إالي يخلصونه.
عبدالله : والله أنا ودي يصير مكتب رئيسي هنا ، أي معاملة الواحد يبي يوديها ويوصلها المكتب هذا ، يبي شيء و يسوي شيء والله يجدد شئ يجي على المكتب أحسن له من يروح هناك يمكن يكون عنده شغل ويوصل متأخر تقفل المكاتب هناك تقفل الدائرة إلي رايح قاصد فيها.
وسألنا أحد الأخوة : لماذا لم تقدم طلب للحصول على الجنسية البحرينية ؟
أجاب : أنا عسكري يعني ما أقدر أطلع جواز بحريني .. فما أدري شنو تقترحون علينا نشوفه .. والله يا أخي فيه دواسر صاروا يدقرون لهم ألحين ، صاروا يعرفوهم ويدقرون لهم مايطلع ، قالوا بسحبون جوازاتهم ما أدري ايش واحنا من نوع الناس الي تخاف ، ما نقدر نقدم على شيء بعدين نروح في مشاكل.
بعدها ودعنا اخواننا في المملكة العربية السعودية ورجعنا للوطن.
نهاية الشريط وبداية العمل الجاد ضد التجنيس السياسي السري.